[东方报]英超：死球戰術恰到對手 賓福特爆錘有法寶[10-20]

今晚英超獨腳戲「倫敦打吡」，「錘仔幫」韋斯咸主場鬥賓福特。兩隊開季成績低落，暫時排尾2嘅韋斯咸情況更係水深火熱，就算換帥後表現都冇大起色，唔識應付死球嘅弱點隨時被賓福特打爆，賓福特今季偶有佳作，不妨直取客勝。（Now 621周二凌晨3時直播）

韋斯咸今季7輪聯賽只得1勝，上月管理層忍無可忍，怒炒領隊樸達，仲即時搵嚟紐奴接手，諗住借用佢喺英超嘅豐富經驗，幫球隊重返正軌。

韋斯咸換帥冇起色
不過紐奴上任後，球隊表現未有太大改善，近兩場聯賽只得1和1負，就算中場湯馬士蘇錫克刑滿復出，但佢季初狀態低迷，紐奴用唔用佢仲係未知數，加上德國箭頭富克洛有傷在身，韋斯咸想入波難上加難。

賓福特今季喺多位主力離隊下，表現一如所料出現下滑，不過佢哋踢法務實，簡單直接嘅戰術仍具一定戰鬥力，今季就曾贏過曼聯同阿士東維拉、又試過作客打和車路士，前鋒伊戈泰亞高喺聯賽已射入4球，腳風甚順，有能力撕破「錘仔幫」大門。

值得留意係賓福特主帥安祖斯係前死球教練，球隊亦以死球戰術見稱，咁啱韋斯咸今季就有8次死球失波，屬英超最多，賓福特大可用呢招搵食。翻查兩隊近8次聯賽交鋒，賓福特贏咗6場，甚有格食格味道，一於再追客勝。