[东方报]世冠盃：國米半大打爆紅鑽[06-21]

為爭出線壓迫反搶
世冠盃E組次輪，國際米蘭對浦和紅鑽，國米首輪只能1比1逼和蒙特雷，未能打開勝利之門，為爭出線次輪必須盡快進入狀態，今場對同組實力最弱嘅浦和紅鑽，勢必主動搶攻，國米近兩場半場全開2球或以上，1.5球半場大值博。（周日凌晨3時開賽）

國際米蘭近3季兩度打入歐聯決賽，可惜兩次都屈居亞軍，今季更喺意甲及意大利盃接連失利只得「3料亞軍」，今屆世冠盃誓要捧盃而回；佢哋本月初歐聯決賽慘敗後換帥，施蒙尼恩沙基過檔希拉爾，羅馬尼亞名宿捷禾回巢領軍，但佢上場「地標戰」頭炮打唔響，只能賽和蒙特雷，不過賽事數據顯示，國米全場控球超過6成，射門多達15次，整體表現其實唔差，經過首場磨合，今場會有更佳表現。

上場國米排陣所見，捷禾繼續沿用由干地至施蒙尼恩沙基時期一直採用嘅352陣式，分別在於捷禾嘅戰術對於球員無球跑動嘅要求較多，希望多做壓迫反搶，其中隊長拿達路馬天尼斯已經入波「開齋」，今場可望再有進帳。

東瀛兵陪跑今非昔比
紅鑽上仗1比3不敵河床，落敗並唔令人意外，呢支日職球隊憑2022年贏得亞冠盃取得今屆世冠盃參賽資格，奪冠至今已經過咗3年，教練都換咗4次，世盃國腳酒井宏樹亦於去年離隊，呢支「東瀛兵」近年喺本土賽事表現未算突出，嚟到國際大賽只屬陪跑分子，今場遇上意甲勁旅國米，再輸並不出奇，半場輸多過兩球亦好正常。